വാത്മീകി“ ജന്മമാത്ര ദ്വിജത്വം മുന്നമുള്ളതും ബ്രഹ്മകർമ്മങ്ങളുമൊക്കെ വെടിഞ്ഞു ഞാൻ” ശ്രദ്ധാവതി നഗരത്തിൽ വരുണദേവൻ്റെ പത്താമത്തെ പുത്രനായി പിറന്നവനാണ് വാത്മീകി . ശിശു ജനിച്ച ഉടനെ തന്നെ അരമന ജ്യോത്സ്യനെ കൊണ്ട് വരുണൻ ജാതകം കുറിച്ചു. അതിൻ പ്രകാരം ജോത്സ്യൻ പറഞ്ഞു ശിശുവിൻ്റെ വലതു തോളിൻ്റെ പിൻ ഭാഗത്ത് മത്സ്യാകൃതിയിലുള്ള കറുത്ത മറുക് ഉണ്ടായിരിക്കുവാൻ സാദ്ധ്യതയുണ്ട്. അപ്രകാരം ഉണ്ടെങ്കിൽ വിയോഗ ദുഃഖമാണ് ഫലം. ജനനം ശകടയോഗത്തിലാകയാൽ കുലധർമ്മവും ആചാരവും വെടിഞ്ഞ് നീചകൃത്യങ്ങളിൽ വ്യാപൃതനാകുവാനും സാദ്ധ്യതകൾ കാണുന്നു. യോഗകാരകനായ ഗുരു, ജ്ഞാനദായകനായ ബുധനുമായി ബലവാനായി സ്ഥിതി ചെയ്യുന്നതിനാൽ ഈശ്വരാധീനത്താൽ വിഖ്യാതനായി ഭവിക്കുന്നതിനുള്ള ഉപരിയോഗവും കാണുന്നുണ്ട്. ഇതായിരുന്നു നവജാത ശിശുവിൻ്റെ സാമാന്യജാതക ഫലം. ഈ സമയം വരുണ രാജധാനിയിലെത്തിയ നാരദൻ വരുണൻ്റെ ദുഃഖം കണ്ട് ഇങ്ങനെ പറഞ്ഞു. ഒരാൾ എന്തായിത്തീരണമെന്ന് തീരുമാനിക്കുന്നത് ഈശ്വരനാണ്. അങ്ങയുടെ പുത്രൻ നാളെയുടെ വരപ്രസാദമാണ്. ലോകം ഉള്ളിടത്തോളം കാലം ഈ കു ഞ്ഞിൻ്റെ പേരും പെരുമയും നിലനിൽക്കുകയും ചെയ്യും. വരുണ രാജധാനിയിൽ നിന്ന് പോയ നാരദൻ ചെന്നത് അഗ്നിദേവൻ്റെ നഗരമായ തേജോവത...